आर्ष खबर

आर्ष खबर देश

नेपालीहरु झुटो बोल्छन् ?

  • रवीन्द्र रिजाल

युवान च्वाङ्गको यात्रा वृत्तान्तमा नेपालको बारेमा उल्लेख गरेको पाइन्छ । यस पुस्तकलाई स्यामुयल बीलद्वारा अंग्रेजी भाषामा अनूवादित गरिएको छ । चिनियाँ यात्री च्वाङ्गले अंशुवर्मा भर्खर भर्खर लिच्छवि कालको राजा भएको बखत नेपाल भ्रमण गरेका थिए । भ्रमण पश्चात नेपालको वर्णन गर्ने शिलशिलामा खेती, प्रकृति र कलाको सुन्दर बर्णन गरेका छन् । नेपाली चालचलनबाट भने चिनियाँ यात्री सन्तुष्ट हुन सकेको पाईंदैन । नेपालीहरु झुटो बोल्छन् । नेपालीहरुको चालचलन झुटो बोल्ने र पत्यार गर्न नसकिने छ । यहाँका मानिसहरुका स्वभाव उज्जण्ड छ । तिनीहरु सत्यको वास्ता गर्दैनन् र मान्नु पर्नेलाई मान्दा पनि मान्दैनन् । तिनीहरु अनपढ भए तापनि कालिगढी काममा भने सिपालु छन् । तिनीहरुको अनुहार नराम्रो र डरलाग्दो छ भनि उल्लेख गरिएको पाइन्छ ।

नेपाली माटोमा धेरै पसिना र रगत बगिसकेको छ । पानीको त कुरै नगरौं प्रशस्त बगिसक्यो । १५ सय वर्ष अगाडि चिनियाँ यात्रीले देखेको खेती, प्रकृति र कलालाई खास रुपमा आजसम्म आइपुग्दा जोगाउन सकेको देखिदैन । खाद्यन्न, मल, बिउबिजनमा परजीवी बन्न पुगेका छौं । प्रकृतिमा भएका अथाह स्रोतलाई चिन्न छोडिसकेका छौं । कला देखासिकी बनाइ पोली खाइहाल्यौं । यस्तो परिस्थितिमा विश्व जगतलाई ठोस रुपमा देखाउने कुरा के हो ? भन्ने कुरा के हो ? गम्भीर परीक्षाको घडिमा नेपाल राष्ट्र उभिएको छ । लिच्छविकाललाई स्वर्णकालको रुपमा चिनिन्छ । मल्लकालमा लुन्तभद्र बज्राचार्यद्वारा तयार गरिएको नारद संहितामा आधारित मानवन्यायशास्त्र जयस्थिति मल्लले कार्यान्वयनमा ल्याएका थिए । यो कार्यान्वयन पश्चात मान्छेले मान्छेलाई हेर्ने स्वभावमा परिवर्तन आयो । बिस्तारै समाज बिभाजनमा फस्यो । मानिसहरुको चालचलन चिनियाँ यात्रीले भने भन्दा फरक हुन सकेन । वि.स १९१० मा जंगबहादुरले ल्याएको मुलुकी ऐनले समाजलाई वर्गिय रुपमा पनि बिभाजन गर्न सफल भयो । यसकै श्रृंखला यो वा त्यो तरिकाले आजसम्म चलिरहेको भान नेपाली समाजमा पर्न थालेको छ ।

नेपालमा विभिन्न समयमा राजनैतिक क्रान्ति सफल भए । व्यवस्था हेरफेर भयो । आफ्नो कलाकौशल, परम्परागत उद्योगधन्दा, व्यापार, वाणिज्य अटुट रुपमा चलाइरहन भने कुनै व्यवस्थाले सकेन । यो परिदृश्यबाट नेपाली युवाहरु टिक्न नसकेर बिदेश पलायन भएका छन् । अथाह स्रोतको भण्डार हँुदा हँुदै पनि हामी नेपाली लोत्याङ्ग्रे भयौं । स्वभाव र चालचलनमा परिवर्तन हुन नसकेकै कारण पश्चिमी लेखक, यात्री र इतिहासकारले पनि नेपालीहरुलाई हेपेर अपमानजनक टिप्पणी आफ्नो साहित्यमा लेखेका छन् । पश्चिमा लेखकहरुको दृष्टिमा खसहरु असभ्य हुन, त्यस्तै नेवारहरु असभ्य र फोहोरी हुन । नेपाली महिला कुरुप हुन्छन, यिनीहरुलाई मानिस भन्नु भन्दा भूत भन्नु राम्रो हुन्छ । यसैगरी पश्चिमाहरुले सबै जनजातीहरुलाई कुनै न कुनै बिल्ला भिराइ दिएका छन । के साँच्चै बिदेशीहरुले भने जस्तै नेपालीहरुको चालचलन झुटो बोल्ने, पत्यार गर्न नसकिने र स्वभाव उज्जण्ड नै छ त ?

हाल नेपालमा बहुमतको सरकारले सत्ता सञ्चालन गरिरहेको छ । समाजवादप्रति प्रतिबद्ध रही समृद्ध राष्ट्र निर्माण गर्न कस्सिएको सर्वहारा वर्गको अग्रदस्ता भनिएको नेपाल कम्युनिष्ट पाटी नेकपाले इतिहासमा भएका भुलहरुलाई समीक्षा र संष्लेषण गर्दै अगाडि बढ्न सक्छ या सक्दैन ? आफुसँग भएको लाखौं कार्यकर्तालाई ठोस योजना सहित परिचालन गर्नमा सफल हुन्छ या हुँदैन ? नेपालीहरुसित भएको गौरवको इतिहासलाई एक पटक एकताबद्ध बनाउँदै सगरमाथा भैंm चुलाउन सक्छ या सक्दैन ? विश्वव्यापी महामारीको रुपमा फैलिएको कोभिड १९ भाइरसबाट नेपाललाई जोगाउन खेलिने सकारात्मक, रचनात्मक कदमले नेपालीहरुको स्वभावको पनि परिचय दिन्छ । संकटको बेलामा ढुक्कले अभिभावकको भूमिका खेल्न सक्नु पर्दछ । मानव जाती माथि कै यो संकटबाट नेपालीलाई सुरक्षित तवरले अवतरण गर्न सके सुनमा सुगन्ध हुनेछ । इतिहासदेखि खेप्दै आएको आरोप पखाल्ने अवसर यति बेला आएको छ । सरकार, प्रतिपक्ष र नागरिक यो अवसरबाट चुके पुष्टि हुन्छ कि नेपालीहरु सुध्रेका छैनन् झुटो नै बोल्छन् । सत्यको वास्ता गर्दैनन् ।

Related posts

‘नेपालले चिनियाँ सरकारका अनुभव र कामहरु सिक्न आवश्यक’

Aarsha Khabar

भागबण्डाका कारण नेकपाको एकता प्रक्रियाकामा ढिलाइ

Aarsha Khabar

विकासका लागि मानवीय क्षमताको विकास गर्नुपर्ने : अर्थमन्त्री

Aarsha Khabar